වන අලි ආරක්ෂාව සහ ග්‍රාමීය ජනතාවගේ දෛනික ජීවිතය සුරක්ෂිත කිරීම ජනාධිපති ප්‍රමුඛතාවය කරයි.
ජනාධිපති අනුර කුමාර දිසානායක මහතා අද (24) පස්වරුවේ ජනාධිපති ලේකම් කාර්යාලයේදී වන අලි ආරක්ෂාව සහ ග්‍රාමීය ජනතාවගේ දෛනික ජීවිතය සුරක්ෂිත කිරීම සම්බන්ධයෙන් අදාළ අමාත්‍යවරුන් සහ නිලධාරීන් සමඟ සාකච්ඡාවක් පැවැත්වීය.
මෙම හමුවේදී වන අලි හේතුවෙන් සිදුවන හිංසාකාරී සිදුවීම් වැඩිවීම සහ ග්‍රාමීය ජනතාවගේ දෛනික ජීවිතයට ඒවායේ අහිතකර බලපෑම පිළිබඳව ජනාධිපතිතුමා විමසා සිටියේය.
නිලධාරීන් විසින් පවතින තත්ත්වය සහ මෙම ගැටලුව ඵලදායී ලෙස විසඳීම සඳහා අදාළ ආයතන දිගු කලක් තිස්සේ මුහුණ දෙන දුෂ්කරතා පිළිබඳව ජනාධිපතිතුමා දැනුවත් කරන ලදී.
කිසිදු තත්වයක් යටතේ වන අලින්ට හානියක් හෝ හිංසාවක් නොකළ යුතු බව ජනාධිපති දිසානායක මහතා අවධාරණය කළ අතර, කෙටි කාලීන, මධ්‍ය කාලීන සහ දිගු කාලීන විසඳුම් හඳුනාගැනීමේ වැදගත්කම අවධාරණය කළේය. ගම් මට්ටමින් ගැඹුරු තක්සේරු කිරීම් සිදු කරන ලෙස ජනාධිපතිතුමා නිලධාරීන්ට උපදෙස් දුන් අතර, දේශපාලන නායකත්වයේ සහ මහජනතාවගේ සහයෝගය ඇතිව ඵලදායී විසඳුම් ලබා දිය යුතු බව සඳහන් කළේය.
ජනාධිපතිතුමා අදාළ අමාත්‍යවරුන්ට සහ නිලධාරීන්ට උපදෙස් දුන්නේ වත්මන් මානව සම්පත් හිඟයට විසඳුම් ලෙස සිවිල් ආරක්ෂක බලකායේ සාමාජිකයින් 5,000 ක් වහාම සහායකයින් ලෙස අනුයුක්ත කරන ලෙසයි.
වනජීවී දෙපාර්තමේන්තුවේ නිලධාරීන්ට වෙන් කර ඇති වාහන සංඛ්‍යාව වැඩි කරන ලෙස ජනාධිපති දිසානායක මහතා තවදුරටත් උපදෙස් දුන්නේ, පවතින හිඟය ඔවුන්ගේ රාජකාරීවලට බාධා කරන බව පෙන්වා දෙමිනි. ඒ අනුව, මේ සඳහා කුඩා ප්‍රමාණයේ ට්‍රක් රථ සහ යතුරුපැදි මිලදී ගැනීමට කඩිනම් පියවර ගන්නා ලෙස උපදෙස් දෙන ලදී.
මීට අමතරව, වන අලි ගම්මානවලට ඇතුළු වීම වැළැක්වීම අරමුණු කරගත් යෝජිත කිලෝමීටර් 800 ක විදුලි වැටවල් සහ අලි මංකඩ 16 ක් ප්‍රතිසංස්කරණය කිරීම සඳහා අවශ්‍ය සැලසුම් කඩිනමින් සකස් කර ඉදිරිපත් කරන ලෙස ජනාධිපතිතුමා ඉල්ලා සිටියේය.
වනජීවී සංරක්ෂණ දෙපාර්තමේන්තුව තුළ ඇති සන්නිවේදන හිඩැස්වලට කඩිනම් විසඳුමක් ලබා දෙන ලෙසත්, මහජනතාවට තොරතුරු සහ ආධාර ලබා ගැනීම සඳහා විධිමත් පද්ධතියක් ස්ථාපිත කිරීමේ අවශ්‍යතාවත් ජනාධිපති දිසානායක මහතා අවධාරණය කළේය.
මෙම අවස්ථාවට මහජන ආරක්ෂක අමාත්‍ය ආනන්ද විජේපාල, පරිසර අමාත්‍ය ධම්මික පටබැඳි, පරිසර නියෝජ්‍ය අමාත්‍ය ඇන්ටන් ජයකොඩි, පරිසර අමාත්‍යාංශයේ ලේකම් කේ.ආර්. උඩුවාවල, වැඩබලන පොලිස්පති ප්‍රියන්ත වීරසූරිය, සිවිල් ආරක්ෂක දෙපාර්තමේන්තුවේ අධ්‍යක්ෂ ජනරාල් මේජර් ජනරාල් පලිත ප්‍රනාන්දු, වනජීවී දෙපාර්තමේන්තුවේ අධ්‍යක්ෂ ජනරාල් එම්.එස්.එල්.ආර්.පී. මාරසිංහ, නියෝජ්‍ය අධ්‍යක්ෂ (අලි සංරක්ෂණ) වී.එල්. තවුෆීන්, පරිසර කොට්ඨාසයේ නියෝජ්‍ය පොලිස්පති බිම්ෂානි ජාසිං ආරච්චි, වන සංරක්ෂක ජනරාල් එස්.සී. පලමක්කුඹුර, මෙන්ම ආරක්ෂක අංශ නියෝජිතයින් සහ වන සංරක්ෂණ දෙපාර්තමේන්තුවේ නියෝජිතයින් සහභාගී වූහ.